ماڵپه‌ری ئیسلام كورد
Rss
Logo
ADS
زاراوه‌كانی قیرائات

مه‌تنی تحفة الأطفال

ته‌فسیری قورئانی پیرۆز

شێوازی نوێژی پێغه‌مبه‌ر

ئامۆژگاری بۆ موسڵمانان

كاتی بانگه‌كان&بانكبێژان

24 كاتژمێر راسته‌وخۆ

ئاماری ماڵپه‌ر
میوانانی سه‌رهێل

ژماره‌ى سه‌ردانه‌كان

ڕاپرسی ماڵپه‌ر
ئایا تا ئێستا سوودت له‌ ماڵپه‌ری ئیسلام كورد بینیوه‌؟؟؟

ماڵپه‌ره‌ كۆنه‌كه‌مان
عه‌لمانیه‌ت بناسه‌
گێژاوی مه‌دخه‌لیزم
مێژووی انصار الاسلام
فیرعه‌ونی زه‌مان و قه‌یرانی...

 

 

 

ئه‌م بابه‌ته‌ بڵاوكراوه‌ته‌وه‌
له‌ به‌شی : ژیانی پیاوچاكان,

 

ئەو دە کەسەی لە دونیادا مژدەی بەهەشتیان وەرگرت


ئاماده‌كردنی: ماڵپه‌ری ئیسلام كورد

ئه‌و موسوڵمانه‌ به‌ڕێزانه‌ی پێش هه‌موو كه‌س باوه‌ڕیان هێناو له‌ پێناوی خوای په‌روه‌ردگاردا جۆره‌ها ناڕه‌حه‌تی و كوێره‌وه‌رییان بینی، خوایی گه‌وره‌ به‌ڵێنی پاداشتی زۆری پێدان، هه‌ندێكیان
به‌شێك له‌و پاداشته‌ی خوای گه‌وره‌یان هه‌ر له‌ دنیادا بینیه‌وه‌و به‌شی زۆرینه‌شیانی بۆ قیامه‌تیان بۆ هێشتنه‌وه‌، نابینیت چۆن خوای په‌روه‌ردگار باس له‌وان و پاداشته‌كه‌یان له‌ ئایه‌تانێكدا ده‌كات كه‌ هه‌تا دنیا دنیایه‌ نه‌وه‌ به‌ نه‌وه‌ی موسوڵمانان ده‌یخوێننه‌وه‌و ته‌مه‌ننا ده‌كه‌ن بگه‌نه‌ نزیك ئاستی ئه‌وان: (وَعَدَ اللَّهُ الَّذِینَ آمَنُوا مِنكُمْ وَعَمِلُوا الصَّالِحَاتِ لَیَسْتَخْلِفَنَّهُم فِی الْأَرْضِ كَمَا اسْتَخْلَفَ الَّذِینَ مِن قَبْلِهِمْ وَلَیُمَكِّنَنَّ لَهُمْ دِینَهُمُ الَّذِی ارْتَضَى لَهُمْ وَلَیُبَدِّلَنَّهُم مِّن بَعْدِ خَوْفِهِمْ أَمْنًا یَعْبُدُونَنِی لَا یُشْرِكُونَ بِی شَیْئًا) النور / ٥٥ واته‌ خوای په‌روه‌ردگار به‌ڵێنی خۆی به‌و كه‌سانه‌تان داوه‌ كه‌ باوه‌ڕیان هێناو كرده‌وه‌ی چاكیان كرد كه‌ حه‌تمه‌ن له‌ دنیادا ده‌یانگه‌ێنێته‌ هێزو ده‌سه‌ڵات هه‌ر وه‌كو كه‌ ئه‌وانی پێش ئه‌مانی گه‌یانده‌ هێزو ده‌سه‌ڵات و حه‌تمه‌ن دینه‌كه‌شیان كه‌ خوا پێی ڕازییه‌ بۆ ده‌كاته‌ فه‌رمانڕه‌واو ئه‌و ترس و 

بیمه‌ی هه‌شیانه‌ خوا بۆیان ده‌گۆڕێت بۆ هێمنی و ئاسووده‌یی و ئاشتی به‌و مه‌رجه‌ی شه‌ریك بۆ من (له‌ ترس و بیمدا) دروست نه‌كه‌ن..
خوای گه‌وره‌ فه‌رمانی به‌ پێغه‌مبه‌ر نازداره‌كه‌ی صلى الله علیه وسلم دا كه‌ مژده‌ی به‌هه‌شت بدات به‌ یاوه‌رانی خۆی، به‌وه‌ی كه‌ به‌ شێوه‌یه‌كی گشتی پێی فه‌رموو: (وَبَشِّرِ الَّذِین آمَنُواْ وَعَمِلُواْ الصَّالِحَاتِ أَنَّ لَهُمْ جَنَّاتٍ تَجْرِی مِن تَحْتِهَا الأَنْهَارُ) البقره‌/٢٥ واته‌ : مژده‌ به‌و كه‌سانه‌ بده‌ كه‌ باوه‌ڕیان هێناوه‌و كرده‌وه‌ی چاكیان ئه‌نجام داوه‌ كه‌ حه‌تمه‌ن به‌هه‌شتانێكیان ده‌درێتی كه‌ ئاوو ڕۆبار به‌ ژێریاندا دێت و ده‌ڕوات..
له‌مه‌وه‌یه‌ كه‌ مژده‌ی به‌هه‌شت هه‌موو یاوه‌رانی پێغه‌مبه‌ر صلى الله علیه وسلم ده‌گرێته‌وه‌ مادام له‌سه‌ر ئه‌و باوه‌ڕو یه‌قینه‌ مابنه‌وه‌ كه‌ له‌ سه‌رده‌می ژیانی پیرۆزی پێغه‌مبه‌ردا صلى الله علیه وسلم له‌سه‌ری بوون..
به‌ڵام له‌گه‌ڵ ئه‌م مژده‌ گشتیه‌دا پێغه‌مبه‌ری پێشه‌وا صلى الله علیه وسلم مژده‌ی تایبه‌تی به‌ هه‌ندێكی تر له‌ یاوه‌رانی به‌ڕێزی خۆیداوه‌، كه‌ ئه‌هلی به‌هه‌شتن.. ده‌ كه‌س له‌و به‌ڕێزانه‌ ناویان پێكه‌وه‌ له‌ فه‌رمووده‌ی سه‌حیحدا هاتووه‌و هه‌ر له‌و ڕۆژه‌وه‌ له‌ ناو موسوڵماناندا به‌ عه‌شه‌ره‌ی موبه‌ششه‌ره‌ ناسراون واته‌ ئه‌و ده‌كه‌سه‌ی مژده‌ی به‌هه‌شتیان له‌ دنیادا پێدرا.. له‌و فه‌رمووده‌انه‌ فه‌رمووده‌ه‌كه‌ی سه‌عیدی كوڕی زه‌یده‌ كه‌ خۆشی یه‌كێكه‌ له‌و عه‌شه‌ره‌ موبه‌ششه‌ره‌یه‌، ده‌گێڕێته‌وه‌ كه‌ پێغه‌مبه‌ر صلى الله علیه وسلم فه‌رمووی ده‌ كه‌س ئه‌هلی به‌هه‌شتن ئه‌بوبه‌كر له‌ به‌هه‌شته‌و عومه‌ر له‌ به‌هه‌شته‌و ئیتر ناوی ئه‌وانی تریشی هێنا و فه‌رمووی: (عَشَرَةٌ فی الجْنَّةِ : ابوبكرٍ فی الجنَّة ، وعُمرُ فی الجنة ، وعثمانُ وعلیٌّ و الزبیرُ و طلحةُ وعبدُالرحمنِ بنُ عوفٍ وابو عُبَیدَةَ بنُ الجّرَّاحِ وسَعدُ بنُ ابی وقَّاصٍ) كه‌ له‌سه‌ر ئه‌و ناوه‌ وه‌ستا پرسییان: ئه‌دی خۆت؟ فه‌رمووی به‌ڵێ منیش . بوخاری و ترمزی گێڕاویانه‌ته‌وە ،،١،

ئه‌مه‌ش كورته‌یه‌ك له‌ ژیانی پڕ فه‌ڕی هه‌ر یه‌كه‌یان:

١ـ ئه‌بوبه‌كری سددیق: ناوی عبدالله‌ی كوڕی عوسمانه‌، یه‌كه‌مین كه‌س بوو له‌ پیاواندا كه‌ موسوڵمان بوو، كه‌س وه‌كو ئه‌و پشتیوانی له‌ پێغه‌مبه‌ر صلى الله علیه وسلم نه‌كردووه‌، هه‌ر هه‌موو سه‌روه‌ت و سامانی له‌ پێناوی سه‌رخستنی بانگه‌وازه‌كه‌ی پێغه‌مبه‌ردا صلى الله علیه وسلم خه‌رج كرد، له‌ كۆچكردن بۆ مه‌دینه‌و خۆ شاردنه‌وه‌ی ئه‌شكه‌وته‌كه‌ی سه‌وردا هاوڕێی پێغه‌مبه‌ر صلى الله علیه وسلم بوو كه‌ به‌ پله‌و پایه‌ی گه‌وره‌ داده‌نرێت!! دوای پێغه‌مبه‌ری سه‌روه‌رمان صلى الله علیه وسلم ئه‌و بووه‌ یه‌كه‌مین خه‌لیفه‌ی موسوڵمانان له‌سه‌ر ده‌می حوكمی خۆیدا فیتنه‌و ئاژاوه‌ی مورته‌دده‌كانی زینده‌به‌چاڵ كردو كوژاندیه‌وه‌، له‌ سه‌رده‌می حوكمی دووساڵه‌ی ئه‌و دا ئازاد كردنی سوپای ئیسلام ده‌ستی پێكرد.. پێغه‌مبه‌ر صلى الله علیه وسلم فه‌رمووده‌ی له‌ مه‌تحی ئه‌ودا زۆره‌، ساڵی ١٣ك كۆچی دوایی كرد، ته‌مه‌نیشی هه‌ر وه‌ك ته‌مه‌نی پێغه‌مبه‌ر ێلى الله علیه وسلم بوو ، واته‌ ٦٣ ساڵ! له‌ ژووره‌كه‌ی خاتوو عائیشه‌ی كچی كه‌ خێزانی پێغه‌مبه‌ره‌ صلى الله علیه وسلم گیانی سپاردو له‌ ته‌نیشت پێغه‌مبه‌ری نازداره‌وه‌ نێژرا! خوا لێی ڕازی بێت..

٢ـ عومه‌ری كوڕی خه‌تتاب: له‌ ساڵی پێنجه‌م یان شه‌شه‌می پێغه‌مبه‌رێتیدا له‌ مه‌ككه‌ موسوڵمان بوو، موسوڵمان بوونه‌كه‌ی بۆ موسوڵمانان خێرو به‌ره‌كه‌ت بوو، چونكه‌ پێش موسوڵمان بوونی ئه‌م هه‌موو موسوڵمانه‌كان له‌ ماڵی ئه‌رقه‌می كوڕی ئه‌بو ئه‌رقه‌می مه‌خزوومی له‌ سه‌فا خۆیان شاردبۆوه‌، به‌ڵام كه‌ ئه‌م موسوڵمان بوو خۆیان ئاشكرا كردو نه‌ترسان، عومه‌ر خوا لێی ڕازی بێت وه‌كو ئه‌بوبه‌كری سددیق خوا لێی ڕازی بێت هۆگری پێغه‌مبه‌ری سه‌روه‌ر بوو صلى الله علیه وسلم هه‌میشه‌ له‌ خزمه‌تیدا بوو، بۆیه‌ پرس و ڕای به‌م و به‌ سه‌یدنا ئه‌بو به‌كر زۆر ده‌كرد، دوای كۆچی دوایی ئه‌بوبه‌كر ئه‌م بوو به‌ خه‌لیفه‌ی موسوڵمانان، له‌ دادپه‌روه‌ریی و توند پابه‌ندبوونی به‌ حه‌قه‌وه‌ بووه‌ نموونه‌و پێوه‌ری داد.. له‌سه‌رده‌می حوكمی ئه‌مدا فتووحاتی ئیسلامی زۆر په‌ره‌ی سه‌ند، له‌ ساڵی ٢٣ ك دوای ده‌ ساڵ حوكم كردن له‌ كاتی نوێژی به‌یانیدا كه‌ به‌ ئیمامه‌ت له‌ مزگه‌وت بۆ موسوڵمانانی ده‌كرد خه‌نجه‌ری ژه‌هراوی لێدراو شه‌هید بوو.. ئه‌میش ته‌مه‌نی پیرۆزی وه‌كو پێغه‌مبه‌ر صلى الله علیه وسلم و ئه‌بوبه‌كری سددیق خوا لێی ڕازی بێت هه‌ر 63 ساڵ بوو، ئه‌میش هه‌ر له‌ ته‌نیشتی ئه‌بوبه‌كری سددیقه‌وه‌ نێژرا.. خوا لێی ڕازی بێت..

٣ـ عوسمانی كوڕی عه‌ففان: له‌ مه‌ككه‌ له‌ سه‌ره‌تای بانگه‌وازی پێغه‌مبه‌ردا صلى الله علیه وسلم كه‌ ئه‌بوبه‌كری سددیق خوا لێی ڕازی بێت بۆ ئیسلامی بانگ كرد، موسوڵمان بوو، دوو جار كۆچی بۆ حه‌به‌شه‌ كرد، پێغه‌مبه‌ر صلى الله علیه وسلم یه‌ك له‌ دوای یه‌ك دوو كچی خۆی ڕوقه‌ییه‌و ئوم كلسوومی لێ ماره‌ كرد، بۆیه‌ نازناوی زوننوره‌ینی هه‌یه‌ واته‌ خاوه‌ن دوو نوره‌كه‌، زۆرینه‌ی سه‌روه‌ت و سامانی خۆی له‌ پێناوی سه‌رخستنی ئیسلامدا خه‌رج كرد، به‌ تایبه‌تی له‌ غه‌زای ته‌بووكدا كه‌ كاتی قات و قڕی و گرانی بوو، دوای كۆچی دوایی كردنی سه‌یدنا عومه‌ری كوڕی خه‌تتاب خوا لێی ڕازی بێت ئه‌م بوو به‌ خه‌لیفه‌، فه‌زڵی گه‌وره‌ی به‌سه‌ر موسوڵمانانه‌وه‌ نوسینه‌وه‌ی قورئانێتی، كه‌ هه‌مووی كۆكرده‌وه‌و چه‌ند دانه‌یه‌كی لێ نوسرایه‌وه‌و ناردی بۆ هه‌موو ویلایه‌ته‌كانی به‌رده‌ستی، له‌سه‌ر ده‌می حوكمیدا فیتنه‌و ئاژاوه‌ی زۆر به‌رپا بوو، له‌ ساڵی ٣٥ ك له‌ یه‌كێكیاندا له‌ ته‌مه‌نی هه‌شتا ساڵیدا (هه‌ندێك ده‌ڵێن له‌ نه‌وه‌د ساڵیدا) شه‌هید بوو.. خوا لێی ڕازی بێت..

٤ـ عه‌لی كوڕی ئه‌بو تالیب: هێشتا له‌ ماڵی پێغه‌مبه‌ری به‌ڕێزدا بوو صلى الله علیه وسلم منداڵ بوو كه‌ موسوڵمان بوو، پێغه‌مبه‌ر صلى الله علیه وسلم فاتیمه‌ی كچی خۆشه‌ویستی خۆی دایێ، به‌ ئازایه‌تی و زانایی به‌ناوبانگ بوو، دوای سه‌یدنا عوسمان خوا لێی ڕازی بێت له‌سه‌ر ده‌مێكی زۆر پڕ ئاشووب و ئاژاوه‌دا ئه‌م بوو به‌ خه‌لیفه‌.. كاریگه‌رترینیان شه‌ڕی جه‌مه‌ل و سیففین بوو، له‌ ساڵی ٤٠ ك له‌ ته‌مه‌نی ٦٣ ساڵیدا له‌و كاته‌ی له‌ نوێژ ته‌واو بوو شمشێری لێدراو شه‌هید بوو.. خوا لێی ڕازی بێت..

٥ـ ئه‌بو عوبه‌یده‌: كوڕی عامری كوڕی الجه‌ڕڕاح، له‌ مه‌ككه‌ له‌ سه‌ره‌تای بانگه‌وازی خواییدا له‌سه‌ر ده‌ستی سه‌یدنا ئه‌بوبه‌كر خوا لێی ڕازی بێت موسوڵمان بوو، پێغه‌مبه‌ر صلى الله علیه وسلم نازناوی ئه‌مینداری ئوممه‌تی لێنا، له‌ كاتی هاتنی وه‌فدی مه‌سیحیه‌كانی نه‌جراندا پێغه‌مبه‌ر صلى الله علیه وسلم ئه‌می كرده‌ سه‌رۆكی وه‌فدی موسوڵمانه‌كان، زۆر جار پێغه‌مبه‌ر صلى الله علیه وسلم ده‌یكرده‌ ئه‌میری سه‌ریه‌كانی، سه‌یدنا ئه‌بو عوبه‌یده‌ باوكی خۆی له‌ غه‌زای به‌دردا كوشت چونكه‌ له‌ به‌ره‌ی كافراندا بوو، له‌ ساڵی ١٨ ك له‌ تاعوونه‌كه‌ی شاری عه‌مواسی شامدا له‌ ته‌مه‌نی ٥٨ ساڵیدا به‌ تاعوون كۆچی دوایی كردو هه‌ر له‌وێش له‌ غۆری ئه‌رده‌ن نێژرراوه‌ له‌ شوێنێك كه‌ ئێستا هه‌ر به‌ ناوی خۆیه‌وه‌یه‌تی.. خوا لێی ڕازی بێت..

٦ـ عبدالرحمانی كوڕی عه‌وف: له‌سه‌ر ده‌ستی ئه‌بوبه‌كری سددیق خوا لێی ڕازی بێت له‌ مه‌ككه‌ موسوڵمان بوو، خاوه‌ن سه‌روه‌ت و سامان بوو، زۆری له‌ پێناوی خوادا به‌خشی، كه‌ كۆچیشی كرد بۆ مه‌دینه‌ زوو به‌ بازرگانی كردن كه‌ چاكی لێ ده‌زانی، ده‌وڵه‌مه‌ند بووه‌وه‌، یارمه‌تی زۆری موسوڵمانانی مه‌دینه‌شی پێ ده‌دا، ساڵی ٣٠ یان ٣٢ له‌ ته‌مه‌نی ٥٧ ساڵیدا كۆچی دوایی كردو له‌ گۆڕستانی به‌قیع له‌ مه‌دینه‌ نێژرا.. خوا لێی ڕازی بێت..

٧ـ ته‌لحه‌ی كوڕی عوبه‌یدوالله‌: له‌ مه‌ككه‌ له‌سه‌ر ده‌ستی سه‌یدنا ئه‌بوبه‌كری سددیق موسوڵمان بوو، له‌ غه‌زای ئوحوددا پێغه‌مبه‌ر صلى الله علیه وسلم پشتی پیرۆزی خۆی بۆ نه‌وی كرد تا بچێته‌ سه‌ر پشتی و له‌وێوه‌ بازداته‌ سه‌ر تاوێره‌ به‌ردێك!! ئینجا پێغه‌مبه‌ر صلى الله علیه وسلم ده‌رباره‌ی له‌و كاته‌دا فه‌رمووی: (وَجَبَتْ) واته‌ به‌هه‌شتی مسۆگه‌ر كرد! له‌ كاتی شه‌ڕی جه‌مه‌لدا له‌ ساڵی ٣٦ ك له‌ ته‌مه‌نی ٦٤ ساڵیدا كۆچی دوایی كرد.. خوا لێی ڕازی بێت،،٢ ..

٨ـ ئه‌ززوبه‌یری كوڕی ئه‌لعه‌ووام: دایكی ناوی سه‌ففیه‌یه‌ كه‌ كچی عبدالموتته‌لیبی مامی پێغه‌مبه‌ره‌ صلى الله علیه وسلم یه‌عنی پورزای پێغه‌مبه‌ره‌ صلى الله علیه وسلم، له‌ فه‌رمووده‌ی سه‌حیحی بوخاری و موسلیمدا هاتووه‌ ده‌یفه‌رموو: (لِكُلِّ نَبِیٍّ حَواری وحواریَّ الزُّبَیر) واته‌ هه‌موو پێغه‌مبه‌رێك یاوه‌ری زۆر نزیكی هه‌یه‌، یاوه‌ری زۆر نزیكی منیش زوبه‌یره‌.. سه‌یدنا زوبه‌یر له‌ مه‌ككه‌ له‌سه‌ر ده‌ستی سه‌یدنا ئه‌بوبه‌كری سددیق موسوڵمان بوو، ئه‌م یه‌كه‌مین كه‌س بوو كه‌ شمشێری له‌ پێناوی خوادا هه‌ڵكێشا.. له‌ غه‌زای ئه‌حزاب (خه‌نده‌ق) دا پێغه‌مبه‌ر صلى الله علیه وسلم پێی فه‌رموو: (فِـداكَ آ مِّی وآبی)ترمزی گێڕاوێتیه‌وه‌و به‌ فه‌رمووده‌ی حه‌سه‌نی ناساندووه‌، واته‌ دایك و باوكم به‌ قوربانت بن.. ئه‌میش له‌ شه‌ڕی جه‌مه‌لدا له‌ ساڵی ٣٦ ك له‌ ته‌مه‌نی ٦٤ ساڵیدا كۆچی دوایی كرد ٣.. خوا لێی ڕازی بێت..

٩ـ سه‌عیدی كوڕی زه‌ید : ناوی سه‌عیدی كوڕی زه‌یدی كوڕی عه‌مری كوڕی نوفه‌یله‌، خۆی و فاتیمه‌ی خێزانی كه‌ خوشكی عومه‌ری كوڕی خه‌تتابه‌ له‌ مه‌ككه‌ موسوڵمان بوون، یاوه‌رێكی به‌ڕێزه‌و یه‌كێكه‌ له‌وانه‌ی دوعایان گیرا ده‌بوو! له‌ ساڵی ٥١ ك له‌ ته‌مه‌نی ٧٣ یان ٧٤ ساڵیدا ناوچه‌ی عه‌قیق كۆچی دوایی كرد و له‌ مه‌دینه‌ نێژرا.. خوا لێی ڕازی بێت..

١٠ـ سه‌عدی كوڕی ئه‌بو وه‌ققاس: ئه‌میش له‌ مه‌ككه‌ له‌سه‌ر ده‌ستی سه‌یدنا ئه‌بوبه‌كری سددیق موسوڵمان بوو، یه‌كه‌مین كه‌س بوو كه‌ له‌ پێناوی به‌رگریی له‌ دینی خوای گه‌وره‌ تیری هاویشت، ئه‌میش یه‌كێكه‌ له‌و یاوه‌رانه‌ی دوعایان گیرا ده‌بوو ، پێغه‌مبه‌ر صلى الله علیه وسلم له‌ غه‌زای ئوحوددا پێی فه‌رموو: (إرْمِ فِداكَ أمِّی وأبی) موسلیم گێڕاوێتیه‌وه‌، واته‌: تیر بهاوه‌ دایك و باوكم به‌ قوربانت بن.. ئه‌م پاڵه‌وانی شه‌ڕی قادسیه‌ بوو، له‌ ساڵی ٥٥ ك له‌ ته‌مه‌نی ٧٤ ساڵیدا له‌ كۆشكی خۆی له‌ عه‌قیق كۆچی دوایی كرد و له‌ مه‌دینه‌ نێژرا.. كۆتا كه‌سی عه‌شه‌ره‌ی موبه‌ششه‌ره‌بوو كه‌ كۆچی دوایی كرد.. خوا لێی ڕازی بێت 
          

صفحات سایت

پیچک